Kabayan, Mag-Ingat Ka Sana….(FB Sex Photos Scandal)

(dorcenmm)

(Ito ay isinulat upang magbigay babala o paalala sa mga kababaihan (o sige, pati na rin sa mga kalalakihan ^_^) dahil ilang oras pa lamang ang nakararaan  ay may sex photos na nagsi-circulate sa mundo ng   Facebook.  Ang biktima ay isang kawawang OFW na nagkaroon ng relasyon sa ibang lahi o nationality.

Hayyy… buhay nga naman.  Patulog na sana ako nang biglang nag-pop-up ang FB inbox  ng aming group.

“Help!… Please, help me! Paki- report naman itong taong ito“…mula sa isang kaibigan.

Dali-dali ko itong nilagay sa search engine, bumungad kaagad ang reason kung bakit nagpanic ang aking kaibigan at kailangang i-report ito.

Nagulat ako.  Sobrang shock.  Mabilisan kong binasa isa-isa ang mga comments sa bawat picture.  Hindi pandidiri ang aking nararamdaman.  Mas lalong hindi galit o panlalait sa babae na nasa picture.  Ang tanging nararamdaman ko nang oras na iyon nang tinitignan ko ang mga pictures at mga comments ay  AWA.

Tama, sobrang awa ang aking naramdaman. Tila batid na ng babae ang iskandalong ginagawa ng kanyang ex-bf na foreigner.    Ang kanyang boyfriend na ibang lahi ay tila gumawa ng FB account sa pangalan ng babae, kung saan ang kanyang mga kaibigan ay tila naging friend na rin ng kanyang ex noong panahon nila. Nag-upload ito ng mga napakaprivate photos nilang dalawa at mayroon pang mga solo nude.  Lahat ng mga photos na sobrang SPG ay open to the public at naka-tag pa sa mga kaibigan ng babae (at marahil pati sa mga kamag-anak?) base sa comments ng babae na itinag ang mga ito sa iba-ibang kaibigan nila at hindi niya maidelete    Hanggang sa ngayon, ilang oras pa lamang ang nakalilipas ay very sensational ang FB account na iyon.  Sana ay maialis agad ang mga iyon sapagkat ito ay personal defamation.

Sa aking pagbabasa sa ilang comments doon, napagtanto ko na salbahe ang boyfriend ng babae at ilang beses na niya itong iniwan. Pero nakipagbalikan pa rin itong biktima na Pinay. Pinagbibintangan din siyang kinuha niya ang pera ng boyfriend niya.  Nagalit ang boyfriend niyang dayuhan dahil sa pag-iwan nito sa kanya.  Sa madaling salita, na BLACKMAIL ang kawawang Filipina.  At ito nga ngayon, kalat na kalat na sa FB ang mga napakapribadong pictures nilang dalawa .

Hindi masama ang makipagrelasyon sa mga banyaga.  Lalo na kung ikaw ay single naman o walang iniwan na pamilya dito sa Pilipinas.  Pero, kailangan ang matinding pag-iingat.  Tandaan natin na hindi natin sila kalahi; maaari nila tayong gawan ng mga bagay na maaari nating ikasira.  Kung sa kapwa kababayan nga natin magkaminsa’y nagiging biktima  tayo, sa iba pa kayang lahi  na lantad ang sobrang pagmamaliit sa mga Pinay?

Kung sakali man na talagang tunay ang inyong relasyon bilang dalawang taong nagmamahalan, maaari naman na huwag kang pumayag na pati pakikipag-sex  ay kukuhanan pa ng picture o video.  Hindi ninyo hawak ang isip ng inyong karelasyon.  Walang kasiguraduhan na laging may dignidad at kabutihan ang karelasyon.  Hindi natin hawak ang bawat bukas.  Paano kung tulad nito,  hindi na maayos ang takbo ng relasyon, nagdesisyon ka na iwanan mo at ayaw pumayag? Ito ang resulta – ikinalat ang inyong pictures/videos, nalagay ka sa napakalaking kahihiyan.

Ilang personalidad na rin ang naging biktima ng katulad nito.  Ilang ordinaryong mamamayan na rin ang nasangkot; hindi lamang sa mga pictures ito nangyayari.  May ilang nagkuwento na rin tungkol sa mga porn sites kung saan ang iba ay mga biktima ng mga foreigner na mahilig makipagdate sa Pinay at ibang lahi.  Papuntahin sila sa hotel o sa kanilang condo, hindi alam ng babae na may naka set-up pala na video.  Magugulat na lang ang biktima, kapag may nakapagbalita na siya ay nasa porn site.  Minsan na ring nalagay sa mga balita na ang mga walang kamalay-malay na biktima ay may kumalat na palang sex videos sa Quiapo!  Oh my gulay!!!  *_*

Marami din akong kamag-anak, kakilala at kaibigan na ang asawa ay foreigner, kaya hangga’t maaari ay ayaw kong manghusga sa pagkatao ng bawat isa.  Pero, ang buong katotohanan ay nasa harapan natin.  Marami ang umaabuso sa ating mga Pinay; hindi rin natin kasi masisisi ang iba, dahil sobra tayong magtiwala at isa iyan sa ugali ng Pilipino. Kahit  pagdating sa usaping pag-ibig at talagang mahal natin, sobra tayong nagtitiwala.  Ang iba naman ay dahil sa karangyaan na maaaring maibigay ng dayuhan, kaya naman nagagawang makipagrelasyon sa mga taong inakala nila ay makapagbibigay sa kanila ng kaginhawaan.

Pakiusap:  Mahalin sana natin ang ating pagkatao at pagkababae.  Dagdagan ang pag-iingat sa pakikipagrelasyon.  Huwag ilagay ang sarili sa mga sitwasyon na maaaring ikapahamak natin. Hindi po lahat ng mixed marriages or mixed relationships ay nagtatagumpay.  Ang karakter po ay napakahalaga; matuto sana tayong kumilatis ng taong ating pagkakatiwalaan!  Mapabanyaga man o kababayan.

Ibayong pag-iingat lamang po sa ating mga sarili.  Hindi lamang para sa ating sarili kapakanan, kundi respeto na rin natin sa ating buong kapamilya.

(As of this writing, ang sama-samang pagsuplong o pagrereport sa naturang defamation ay nagbunga na ng pagkakaalis sa naturang scandalous account at photos.  Salamat sa mga nagresponde sa panawagan bilang tulong sa ating kababayan.  Sana lang ay wala nang nag-save ng mga photos na iyon!  *_*)